У бліжэйшыя месяцы ў В’етнаме адбудзецца беларуска-в’етнамская сустрэча на вышэйшым узроўні

У бліжэйшыя месяцы ў В’етнаме адбудзецца беларуска-в’етнамская сустрэча на вышэйшым узроўні, на якой кіраўнікі дзвюх дзяржаў дэталёва абмяркуюць пытанні супрацоўніцтва па ўсіх напрамках. Аб гэтым заявіў прэзідэнт Беларусі Аляксандр Лукашэнка сёння ў час сустрэчы з міністрам грамадскай бяспекі В’етнама Ле Хонг Анем.

Кіраўнік дзяржавы падкрэсліў, што беларуска-в’етнамскае супрацоўніцтва развіваецца дынамічна. “Для Беларусі В’етнам з’яўляецца вельмі важнай дзяржавай у Паўднёва-Усходняй Азіі. Гэта апорная дзяржава для нашай краіны ў гэтым рэгіёне, як і Беларусь з’яўляецца для В’етнама апорай у Еўропе”, - сказаў прэзідэнт.

Аляксандр Лукашэнка акцэнтаваў увагу на актыўным развіцці гандлёва-эканамічных адносін паміж краінамі. Ён адзначыў той факт, што кожны год тавараабарот павялічваецца прыкладна на 25 працэнтаў. Разам з тым яго ўзровень - $49,3 млн. - мізэрны ў параўнанні з існуючым патэнцыялам, лічыць беларускі лідэр.

Паводле яго слоў, у Беларусі і В’етнаме выпускаецца вялікая колькасць тавараў, якімі краіны могуць паспяхова абменьвацца. Аляксандр Лукашэнка падкрэсліў, што напярэдадні яго маючага адбыцца візіту ў В’етнам будуць сур’ёзна і дэталёва прапрацаваны магчымасці выхаду на дамоўленасці, якія прывядуць да паляпшэння двухбаковых гандлёва-эканамічных адносін.